Na risposta ai Verdi

 

ENG ITA

Co gran dispiasere rancuremo el comunicado de la Federasion de i Verdi su'l tema de l'Autonomia.

Co elo, el partìo ecologista italian el se mete come unego partio, de i Verdi Europei, contrario a'l federalismo e al desentramento. Insieme a valori come la zustisia sosial, el femenismo, l'anbientalismo, la lota par l'autogoverno la xe defati tra i prinsipi fondamentali de gran parte de i partii verdi europei, come che demostra le so colaborasion de longa data co i movimenti rejonalisti e indipendentisti a l'interno de'l grupo parlamentar europeo Greens/EFA.

Podemo confermar che i so inpegni su sto tema, anca su la baze de'l nostro laoro drento EFAy. Da quando che Sanca la fa parte de sta fameja europea, ghemo defati avuo l'ocasion de cusir un mucio de contati co i movimenti verdi europei, senpre caraterizai da un clima de colaborasion e condivision de l'idea che lotare par l'autogoverno de le regon la sia fondamental par costruir 'na Europa nova e sostenibile.

Vorissimo anca zontar che sti contati i xe stai spesso afiancai da na bela colaborasion co difarenti ativisti ecologisti in Veneto, lori i ga mostrà de conprendare che l'autonomia la xe na granda ocasion par la tutela de'l paesajo e de l'anbiente parché la avissina le istitusion a le parsone, e la parmete a ste ultime de gaver pì vosse de capitolo e pì controlo inte i prossessi dessisionali. Inte'l comunicado de i Verdi se leze solo de come le rejon no le gabia atuà politighe a favor de l'anbiente, par esenpio i ga ostacolà la formasion de parchi naturali nasionali, e de come i sia fondamentalmente colpevoli de i alti tassi de sementificasion che i intaressa i nostri teritori. Anca se Sanca la xe d'acordo inte la linea de prinsipi, volimo far notar che le colpe no le pol essare adossae solche a le region o a i comuni.

Se i se confrontesse co i aministradori locali, i se rendaria, par esenpio, conto de'l fato che la sementificasion la xe spesso causada da i stretissimi vincoli de bilanso inposti a i comuni da'l governo sentral, che i ga spesso costreto sti enti a rincorare a l'alienasion de i propri tereni par far schei e a contar su le conpesasion edilisie come unego viatego par ofrir verde urban e altri servissi fondamentali par i sitadini. I se rendaria anca conto che la resistensa a la costrusion de parchi nasionali no la vegneva tanto da le istitusion ma da i sitaditini, che i teme de essare totalmente parai fora da la zestion de i propri teritori inte le man sol che de lontane burocrasie romane poco interessae a coinvolzare in percorsi de svilupo sostenibile.

Gavarissimo caro anca de farghe vedar el dadrio de la medaja de l'aministrasion de uncuò: la mazor parte de i poteri de tutela de'l teritorio i ze inte le man de'l governo sentrale, cossa gali fato Berlusconi, Renzi, Di Maio, Salvini par tutelar la nostra tera? Par cossa gala da essar Roma a ciapar le decision su le Grandi Navi o Mose invesse che i Venesiani, che i gavarìa podesto metarghe un fren a ste vergogne za tanti ani indrio? O cossa gavarisseli da dir i belunesi de la longa storia de politiche enerzetiche e anbientali fata su la so pel da i governi sentrai, a partir da'l disastro de'l Vajont fin rivar a le sentraline Enel de ancuo? Cossa dovarisseli dir i rovigoti, che i ga dovesto subir ani e ani de trivelasion e el fato de catarse foresti a casa sua sensa poder far gnente?

Un de i passagi che i ne colpisse di pì inte la publicasion de i Verdi la xe na domanda:

Come zelo che se podarìa darghe na resposta a la sfida epocale de l’emerzensa climatica sensa na regia nasional su le politeghe enerzetiche che le possa inviar el paese verso un fabrisogno energetico al 100% rinovabile ?Angelo Bonelli

Volaressimo far notar che la xe propio l’autonomia rezonale che la pol jutarne a farne rivar verso i obietivi che revarda le energie rinovabili elencai da lori, defati el teritorio co la pi granda persentual de consumi energetici coverti da fonti renovabili la xe la Val d’Aosta, co le provinse autonome de Trento e Bolsan che le ghe va drio. Paraltro, anca el Veneto, cofà la provinsa autonoma de Bolsan, el ga duplicà za inte'l 2016 la persentual de consumi coverti da le energie rinovabili che'l ze stà dato par obietivo inte'l 2012 da'l governo sentrale, da rivarghe entro el 2020. Co ogni probabilità, se i la gavesse lassada far, la nostra tera la gavarìa possuo far anca de megio. Tanto xe vero che le aministrasion locai in Veneto le ga fato vedar da tenpo de averghe caro el tema de la cura de l’ambiente, come che i fa notar i livei molto alti de racolta difarensiada confrontai co la media italiana dove che se xe rivai inte la nostra rejon inte i ultemi ani.

Voressimo anca far notar, che se volemo afrontar in maniera seria el problema de'l canbiamento climatico forsi no xe mia na strategia seria augurarse che la diresion la vegna ciapada da Roma. Ocore politiche globai, e xe sicuramente pi realistico pensar che queste le posse rivar a i teritori co un coordinamento direto de questi co le istitusion europee, e miga co le politighe lente de Roma.

Speremo che sti spunti de riflesion i spinza i Verdi a reconsiderar la so posision. I ani ch'i vegnarà el Veneto el gavarà da farghe fronte a le grande sfide, anca a livelo anbientale e de paesajo. Le olinpiadi de'l 2026 le sarà na oportunità granda par la nostra region in considerasion de'l fato de le grande resorse economiche che rivarà inte'l nostro teritorio. Qualo penseo che'l possa essar el mejo parcorso parché ste resorse le vaga drio un svilupo sostenibile invesse che a la solita betonada de semento? Nialtri pensemo che la sia quela de lassar comandar le parsone le conosse par vero el teritorio e che se le vien responsabilizae le ze bone farlo deventar na zogia, sia per chi che ghe vive, ma anca par chi che vegnarà visitarlo.

Se no i ne crede, li invitemo a passar par la provinsa de Belun e da là de ndar vanti par farse un ziro verso Trento e Bolsan, che le xe tacae. Li invitemo a domandarse: indove ghe xele stae le resorse par far na valorizasion seria de'l turismo vardando l’otica de la sostenibilidà e de la promosion de i prodoti locai e biologici? Indove se galo podesto costruir le infrastruture sicrabili e feroviarie par sostegnar un vero turismo sostenibile? In qualo teritorio xe che ghe xe stae le resorse par sostegnar un svelupo sportivo sostenibile e in relasion co'l paesajo?

Se i ghe tegnarà, saremo contenti de discurtene, sensa preconseti, sensa timori.

P.S. par i ativisti de i Verdi in Veneto savemo che ghe tegnì a'l vostro teritorio ma xe rivada l’ora de alsar la vose!

 
Ultima modifica ilLunedì, 15 Luglio 2019 16:03
Matteo Visonà Dalla Pozza

Bio
Laureato in Lingue e Letteratura Turca, vive a Venezia, lavora nel campo del Turismo e si occupa di tematiche Indipendentiste legate alla sinistra.

Ha particolare propensioni alla Linguistica e alla Grafica, benché non professioniste. Si è occupato di organizzazione sportiva e ha vissuto a Londra, Istanbul e Ankara.

Ama
Cani, Gatti, Galline, Storia, Arte, Venezia, Veneto, Grafica, Social Network.

Odia
Caccia, il Cinovenetismo, le cose Raffazzonate, il Razzismo.

Motto
No ghe xe Solusion sensa Liberasion!

Sito web: www.cp11a.com